Skolane vil invitere deg til foreldremøte etter skolestart, der du får bli kjent med skolen og får informasjon om skolekvardagen og korleis du kan bidra. Skolen skal også velje ut representantar til skoleutvala.
Samarbeid, også med foreldra i vidaregåande opplæring
I § 10-3 i opplæringslova står at skolen skal samarbeide med foreldra om opplæringa til eleven. Korleis dette blir gjort, får du informasjon om på den skolen som din ungdom høyrer til.
Ungdommen din skal ha det trygt og godt på skolen
Skolane arbeider heile tida med at alle elevane skal ha eit trygt og godt skolemiljø.
Har ungdommen din hatt utfordringar på ungdomsskolen, er det spesielt viktig at skolen får informasjon om dette så tidleg som mogleg. Viss du trur eller veit at ein elev ikkje har det trygt og godt på skolen, vil vi gjerne vite om det slik at vi kan hjelpe eleven. Dette gjer skolen betre i stand til å førebygge og sikre ei trygg og god tid i vidaregåande. Ta kontakt også dersom det handlar om ting som skjer på fritida, men som påverkar skolekvardagen til ungdommen din.
Du kan seie frå til ein tilsett på skolen, eller du kan melde frå digitalt. Viss du trur eller veit at det er ein frå leiinga på skolen som er grunn til at eleven ikkje har det trygt og godt, skal du melde frå direkte til fylkeskommunen. Du kan også melde frå til Statsforvaltaren i Møre og Romsdal, og særleg om du opplever at du ikkje blir høyrt i ei sak.
Kontakt elev- og lærlingombodet viss du har spørsmål eller treng hjelp
Elev- og lærlingombodet skal ivareta elevane sine rettar, og er eit gratis tilbod til ungdom i vidaregåande opplæring. Ta kontakt med ombodet om du har spørsmål, eller treng støtte i ei sak. Du som føresett kan også kontakte ombodet ved behov.
Her finn du meir informasjon om elev- og lærlingombodet i Møre og Romsdal.
Trygg og inkluderande russetid
Vi veit at mange ungdommar startar tidleg å planlegge russetida. Vi oppfordrar foreldre til å støtte ungdommane i arbeidet for å skape ei inkluderande feiring. Ver ein tydeleg vaksen!
Trykk her for å få meir informasjon om avgangsfeiringa
Følg med i InSchool
På InSchool kan du finne blant anna timeplanar, fråvær og vurderingar. Du vil få informasjon om korleis du kan bruke systemet som føresett, mellom anna på skolen si nettside.
Trykk her for å få meir informasjon om InSchool . Når eleven har fått plass på skolen, kan du logge deg inn i systemet via heimesida til skolen.
Digital kontakt med eleven
Møre og Romsdal fylkeskommune sender viktig informasjon til elevane sikkert og digitalt. Vi oppfordrar derfor alle elevar til å opprette ei digital postkasse, og du som føresett kan gjere eleven merksam på dette.
Trykk her for å få meir informasjon om digital postkasse
Hugs at du er viktig, ta del!
Vis ungdommen din at du involverer deg:
- Still spørsmål, ver nysgjerrig på skolekvardagen og støtt opp om arbeidet til lærarane
- Gi beskjed til/ta kontakt med kontaktlæraren om du har spørsmål eller viktig informasjon.
- Hjelp ungdommen din til nok søvn, eit godt kosthald og andre gode vanar.
- Følg med på ungdommen din, og på medelevane.
- Følg med på kva som skjer i og utanfor skolen.
- Hald deg oppdatert på kva som skjer på skolen, bruk nettsida!
Vi ser fram til eit godt samarbeid og ønsker ungdommen din lykke til med den vidaregåande opplæringa!
Venleg helsing
Erik Brekken
Kompetanse- og næringsdirektør